பரனே என் இதயத்தில் வாரும்

பரனே என் இதயத்தில் வாரும்

பரநோக்கம் நிறைவேற்ற வாரும்

அனுதினம் என்மனம் கழுவிடும்

அழகிய புதுமனம் தந்திடும்

பரிவுடன் பாவியை கண்டிடும் – என்

சுயமதை திருசலவை செய்திடும்

– பரனே

அதட்டிவிடும் நெஞ்சை

அகற்றிவிடும் நஞ்சை

புகுத்திவிடும் எனக்குள் பரமசிந்தை

பரிசுத்தம் கேட்கிறேன் உம் குழந்தை

அழுகிய சிந்தனை மங்கவே

மனதினுள் வசனங்கள் தங்கவே

அகமகிழ்ந்தெனதுள்ளம் பொங்கவே

அடைக்கலம் அருளுமே துங்கவே

– பரனே

திருக்குள்ளவன் மிஞ்சும்

கிறுக்குள்ளவன் கெஞ்சும்

கரத்துடனே உம்மிடம் கதறுகிறேன்

கிருபை கிடைக்கத்தானே பதறுகிறேன்

புவியதன் சோதனை குறையவே

பரமனின் போதனை நிறையவே

பகலதன் பிள்ளையாய் வளரவே

உலகினில் தீபமாய் ஒளிரவே

– பரனே

மயக்கத்திலே மனம்

கிரக்கத்திலே குணம்

உறக்கத்திலிருந்தென்னை எழுப்பிவிடும் – கெட்ட

உணர்ச்சிகள் அனைத்தையும் கொளுத்திவிடும்

அகமதின் கபடினை தள்ளவே

ஆவியின் கனிதனை அள்ளவே

அசுரனை அனுதினம் வெல்லவே

அவனியில் கிருபையைச் சொல்லவே

– பரனே